Njësia Administrative Libonik ka bërë një apel për qytetarët dhe bizneset, duke theksuar ndalimin e rreptë të hedhjes së mbetjeve urbane, bujqësore dhe inerte në vende të paautorizuara, me qëllim mbrojtjen e mjedisit dhe shëndetit publik.
Sipas njoftimit zyrtar, ndalohet depozitimi i mbetjeve anash rrugëve, pranë kanaleve kulluese, në brigjet e lumenjve, si dhe në toka bujqësore apo hapësira publike. Autoritetet sqarojnë se mbetjet duhet të hidhen vetëm në kontejnerët e vendosur nga Bashkia Maliq.
Ndërkohë, bëhet e ditur se çdo shkelje e këtij rregulli do të ndëshkohet me gjobë, në përputhje me parashikimet e Ligjit nr. 57/2025.
Njësia Administrative Libonik u bën thirrje banorëve dhe subjekteve private të bashkëpunojnë me strukturat përgjegjëse të pastrimit dhe të denoncojnë çdo rast ndotjeje, duke theksuar se ruajtja e një mjedisi të pastër është përgjegjësi e përbashkët e të gjithë komunitetit.