Korçë / Pogradec – Konflikt në Blacë dhe aksident në aksin Korçë–Bilisht
Policia e Shtetit ka dhënë detaje të reja lidhur me ngjarjen e ndodhur në fshatin Blacë, në Pogradec. Në vijim të informacionit të publikuar një ditë më parë, specialistët për Hetimin e Krimeve të Komisariatit të Policisë Pogradec kanë ndaluar shtetasin Xh. O., 29 vjeç, i shpallur më herët në kërkim.
Sipas policisë, ai në bashkëpunim me dy shtetas të tjerë, Xh. O. dhe R. O. (të arrestuar në momentin e ngjarjes), janë përfshirë në një konflikt fizik me dy persona të tjerë. Hetimet për zbardhjen e plotë të rrethanave vijojnë.
Ndërkohë, një aksident rrugor është regjistruar në aksin “Korçë–Bilisht”, në afërsi të fshatit Plasë, në Maliq. Shtetasi E. H., 49 vjeç, duke drejtuar automjetin e tij, është përplasur me një mjet tjetër që drejtohej nga shtetasja B. M., 39 vjeçe.
Si pasojë e përplasjes, drejtuesi E. H. ka mbetur i dëmtuar, por ndodhet jashtë rrezikut për jetën. Ndërsa drejtuesja e mjetit tjetër dhe një pasagjer janë transportuar në spital për kontroll mjekësor.
Materialet procedurale i janë referuar Prokurorisë pranë Gjykatës së Shkallës së Parë Korçë, për veprime të mëtejshme.