Siguria nuk pikturohet vetëm me bojë të bardhë
Nga L.M
Pak muaj më parë, në rrugën “28 Nëntori”, pranë Ambulancës Nr. 3, Bashkia Korçë vendosi një kalim të ri për këmbësorët. Ishte një ndërhyrje që shumë qytetarë e prisnin, pasi në këtë segment nuk kishte pasur kurrë një vendkalim të sinjalizuar, edhe pse është një nga rrugët më të frekuentuara të qytetit.
Por, siç ndodh shpesh, qëllimi i mirë nuk mjafton.
Sot, vetëm pak muaj më vonë, vijat e bardha janë zbehur aq shumë sa dallohen vetëm kur je pothuajse sipër tyre. Trotuaret nuk janë përshtatur me rampa për personat me aftësi të kufizuara, prindërit me karroca apo të moshuarit, ndërsa shumë drejtues mjetesh vazhdojnë të kalojnë pa ndaluar, sikur ky kalim të mos ekzistojë.
Kalimi i rrugës në këtë pikë është kthyer në një provë durimi. Qytetarët presin gjatë për të gjetur një moment të sigurt, ndërsa makinat kalojnë njëra pas tjetrës.
Edhe më shqetësues është fakti se vetëm dy muaj më parë, pikërisht në këtë vend, një këmbësor u plagos në një aksident.
Nuk bëhet fjalë për të kritikuar një investim që ishte i nevojshëm. Përkundrazi, është një thirrje që ai të përfundojë siç duhet. Një kalim këmbësorësh nuk vendoset vetëm për të plotësuar një detyrim, por për të mbrojtur jetën e njerëzve.
Prandaj, Bashkia Korçë duhet ta rishohë këtë segment: të rivijëzojë kalimin me materiale cilësore, të ndërtojë rampat e nevojshme dhe të marrë masa që drejtuesit e mjeteve ta respektojnë realisht vendkalimin.