Reshjet intensive të shiut kanë krijuar një situatë të vështirë në territorin e Bashkisë Maliq. Sipas të dhënave zyrtare nga Shërbimi Meteorologjik i Ushtrisë, në 24 orët e fundit janë regjistruar 124 mm reshje, sasia më e lartë në rang qarku dhe ndër më të mëdhatë në nivel kombëtar.
Si pasojë e kësaj sasie të madhe uji, lumi Devoll nuk ka mundur ta përballojë prurjen, duke dalë nga shtrati në disa segmente dhe duke shkaktuar përmbytje në zona të caktuara.
Strukturat e Bashkisë Maliq, shërbimet emergjente dhe forcat përkatëse ndodhen në terren për të monitoruar situatën dhe për të minimizuar çdo problematikë të mundshme, ndërsa po merren masa për garantimin e sigurisë së banorëve dhe mbrojtjen e pronës.
Situata po ndiqet në mënyrë të vazhdueshme dhe autoritetet u bëjnë thirrje qytetarëve të tregojnë kujdes të shtuar dhe të ndjekin njoftimet zyrtare.