Nga data 28 gusht 2025, në orën 10:00 – 14:00, në ambientet e Gjimnazit “Maliq” do të fillojë shitja e teksteve shkollore për vitin e ri arsimor. Lista me titujt sipas shtëpive botuese është afishuar në shkollë dhe është në dispozicion të çdo nxënësi.
Dokumentacioni i nevojshëm për nxënësit përfitues të teksteve falas:
- Certifikatë familjare
- Fotokopje e kartës së identitetit të njërit prej prindërve
- Dokument që vërteton statusin përkatës nga i cili përfitohet lehtësia
Kush përfiton mbështetje buxhetore 100% për tekstet shkollore?
Sipas udhëzimeve në fuqi, kompensimi i plotë i çmimit të teksteve u takon këtyre kategorive të nxënësve të arsimit parauniversitar:
- Ata që kanë përfituar statusin e jetimit
- Ata që vijnë nga familje që trajtohen me ndihmë ekonomike ose pagesë papunësie
- Nxënësit me aftësi të kufizuara, sipas ligjit nr. 57/2019
- Nxënësit që kanë anëtarë të familjes me aftësi të kufizuara, të deklaruar të paaftë për punë
- Nxënësit nga familje ku kryefamiljari përfiton pension invaliditeti
- Nxënësit nga familje ku kryefamiljari përfiton pension pleqërie dhe ka fëmijë në ngarkim pa të ardhura
- Nxënësit që i përkasin komunitetit rom dhe egjiptian
- Nxënësit që gëzojnë statusin e viktimës ose viktimës së mundshme të trafikimit (sipas vendimit nr. 499, datë 29.8.2018 të Këshillit të Ministrave)
- Fëmijët e punonjësve të Policisë së Shtetit, Gardës së Republikës, Shërbimit të Kontrollit të Brendshëm, Forcave të Armatosura, Shërbimit Informativ të Shtetit, Policisë së Burgjeve dhe Shërbimit të Zjarrfikës-Shpëtimit, të cilët kanë humbur jetën në krye të detyrës
Ky proces synon të garantojë barazi dhe mbështetje sociale për nxënësit që kanë më shumë nevojë, duke lehtësuar barrën ekonomike të familjeve në prag të vitit të ri shkollor.