Në kuadër të një nisme të Ministrisë së Bujqësisë dhe Zhvillimit Rural, falë angazhimit të Zëvendësministrit Arian Jaupllari, Drejtorit të QTTB-së Korçë Roland Meçaj, Përgjegjësit të Emergjencave Civile në Prefekturën e Qarkut Korçë Leonidh Muço, si edhe drejtuesit të Repartit Ushtarak nr. 1033 Drenovë, nënkolonel Grabon Kollçinaku, është ofruar ndihmë për blegtorët e zonës së Kolonjës.
Ndihma vjen si pasojë e kushteve të vështira atmosferike të ditëve të fundit, të cilat kanë ndikuar ndjeshëm në sigurimin e bazës ushqimore për blegtorinë. Institucionet përkatëse kanë siguruar dhe shpërndarë misër dhe hime për blegtorët, me qëllim lehtësimin e situatës dhe garantimin e ushqimit për bagëtitë.
Sipas burimeve zyrtare, institucionet do të vijojnë të ofrojnë mbështetje për blegtorët e qarkut edhe në ditët në vijim, për aq kohë sa kushtet e motit mbeten të vështira.