Prefektura e Qarkut Korçë ka njoftuar se, për shkak të punimeve në aksin rrugor Librazhd–Korçë, në zonën e fshatit Dragostunjë, qarkullimi i automjeteve do të bllokohet përkohësisht.
Sipas njoftimit zyrtar, bllokimi do të nisë nga data 3 shkurt 2026 dhe do të zgjasë deri më 5 shkurt 2026, gjatë orarit 22:00 – 05:00. Gjatë këtij intervali, aksi rrugor do të jetë i pakalueshëm për të gjitha mjetet, veçanërisht për automjetet e tonazhit të rëndë.
Autoritetet bëjnë me dije se gjatë orarit të bllokimit do të lejohen të qarkullojnë vetëm autoambulancat, zjarrfikëset dhe mjetet e Policisë.
Për drejtuesit e mjeteve të vogla, qarkullimi do të orientohet nëpërmjet aksit alternativ Maliq – Lozhan – Moglicë – Gramsh, si për mjetet që udhëtojnë drejt Tiranës, ashtu edhe për ato që lëvizin në drejtim të Korçës.
Policia Rrugore do të jetë e pranishme në terren për menaxhimin e trafikut dhe garantimin e sigurisë rrugore. Për çdo emergjencë ose denoncim, qytetarët mund të kontaktojnë numrin 112.
Autoritetet kërkojnë mirëkuptimin dhe bashkëpunimin e qytetarëve gjatë kësaj periudhe.