Kontrolle, procedime penale dhe incidente në juglindje – Bilanci i fundit nga
Drejtoria Vendore e Policisë Korçë
Shërbimet e Sektorit të Qarkullimit Rrugor kanë vijuar kontrollet në territor, duke arrestuar në flagrancë dy shtetas për drejtim mjeti në gjendje të dehur.
Në lagjen nr. 3, në Korçë, u arrestua shtetasi A. P., 35 vjeç, banues në Korçë, pasi u kap duke drejtuar automjetin në gjendje të dehur.
Po ashtu, në Bilisht, u arrestua shtetasi M. S., 32 vjeç, banues në Bilisht, për të njëjtën shkelje.
Procedim penal në Maliq për vetëgjyqësi
Specialistët për Hetimin e Krimeve të Komisariatit të Policisë në Maliq referuan materialet në Prokurori, ku nisi procedimi penal për shtetasin F. C., 45 vjeç, banues në Maliq.
Ai dyshohet se, në kushtet e vetëgjyqësisë, ka penguar bashkëshorten e tij B. C., 36 vjeçe (me të cilën është në proces divorci), të hyjë në banesën e tyre, duke i ndërruar bravën e derës.
Materialet procedurale iu referuan Prokurorisë së Korçës për veprime të mëtejshme.
Kolonjë – Denoncim për largim nga banesa
Në Komisariatin e Policisë në Kolonjë është paraqitur shtetasja V. C., 63 vjeçe, banuese në Tiranë, e cila ka deklaruar se prej datës 26.02.2026 është larguar nga banesa e gjyshes në Leskovik djali i saj, shtetasi T. C., 40 vjeç.
Shërbimet e Policisë po punojnë për gjetjen e tij.
Korçë – Digjet automjet në Bulgarec
Në orët e para të mëngjesit të sotëm, në fshatin Bulgarec, Korçë, ka rënë zjarr në automjetin e shtetasit S. B., i cili ishte i parkuar para banesës së tij.
Grupi hetimor po punon për sqarimin e rrethanave dhe përcaktimin e shkakut të zjarrit.
Informacion paraprak – Incident në Korçë
Në lagjen nr. 7, në Korçë, dyshohet se një shtetas 55-vjeçar, banues në fshatin Vloçisht, Maliq, ka rënë nga lartësia e një hoteli.
Sipas të dhënave paraprake, ai vuan nga probleme të shëndetit mendor. Për pasojë është dëmtuar në këmbë dhe ndodhet në spitalin e Korçës, jashtë rrezikut për jetën.
Grupi hetimor vijon punën për sqarimin e plotë të rrethanave.