Një konflikt i ndodhur brenda një lokali në qytetin e Korçës ka përfunduar me përleshje dhe pasoja për një nga personat e përfshirë.
Sipas informacioneve paraprake, një person ka mbetur i dëmtuar, ndërsa policia ka shoqëruar në ambientet e Komisariatit personin e dhunuar, si edhe pronarin e lokalit, për sqarimin e rrethanave të ngjarjes. Po ashtu, po punohet për identifikimin dhe verifikimin e personave të tjerë të përfshirë në konflikt.
Ngjarja ka ndodhur pasditen e sotme në lagjen nr. 7 të qytetit të Korçës. Paraprakisht dyshohet se konflikti ka shpërthyer si pasojë e konsumimit të tepërt të alkoolit dhe për motive banale.
Policia ka mbërritur menjëherë në vendngjarje dhe ka nisur hetimet, duke sekuestruar edhe pamjet e kamerave të sigurisë së lokalit, me qëllim zbardhjen e plotë të ngjarjes. Detaje të tjera pritet të bëhen publike në vijim.