Komisioni për Veprimtarinë Prodhuese, Tregtinë dhe Mjedisin miratoi sot dy projektligje të rëndësishme: “Për Shëndetin e Bimëve” dhe “Për Shëndetin e Kafshëve”. Këto iniciativa ligjore u prezantuan nga Zëvendësministri i Bujqësisë dhe Zhvillimit Rural, Arian Jaupllari, si pjesë e angazhimit të MBZHR për përafrimin me legjislacionin e Bashkimit Evropian dhe përmbushjen e detyrimeve të procesit të screening.
🔹 Projektligji “Për Shëndetin e Bimëve” synon të krijojë një kuadër të qartë ligjor për mbrojtjen e bimëve dhe produkteve bimore nga dëmtuesit, si dhe për parandalimin e përhapjes së tyre. Ai fokusohet në menaxhimin e risqeve fitosanitare në territorin shqiptar.
🔹 Projektligji “Për Shëndetin e Kafshëve” vendos bazat për parandalimin dhe kontrollin e sëmundjeve të kafshëve, për raportimin në kohë dhe marrjen e masave emergjente për çrrënjosjen e tyre. Ky projektligj synon të garantojë jo vetëm shëndetin e kafshëve, por edhe të njerëzve, duke përforcuar gjurmueshmërinë dhe kontrollin e produkteve me origjinë shtazore.
Miratimi i këtyre projektligjeve përbën një hap të rëndësishëm drejt forcimit të sigurisë ushqimore në vend dhe harmonizimit të plotë me legjislacionin e Bashkimit Evropian.