Kryeparlamentarja Lindita Nikolla ka uruar për Festën e 8 Marsit të gjitha gratë. Me anë të një postimi në rrjetin social Facebook, Nikolla shkruan se për 8 Mars së bashku me gratë kryeparlamentare nga të pesë kontinentet, u mblodhën në Paris në Samitin Botëror, ku themeluan Rrjetin e Grave Kryeparlamentare dhe miratuan Deklaratën për Barazinë dhe të Drejtat e Grave.
Në këtë samit iu bë thirrje parlamenteve të të gjitha vendeve që të vendosin të drejtat e grave dhe barazinë gjinore në krye të agjendave parlamentare.
“Me rastin e 8 Marsit, Ditës Ndërkombëtare të Grave, uroj nga zemra të gjitha nënat, motrat, bashkëshortet dhe vajzat shqiptare.
Këtë vit, tema e përzgjedhur për të kremtuar këtë ditë domethënëse është ‘Të investojmë te gratë, për të përshpejtuar progresin.’
Asnjë faktor a investim tjetër, as njerëzor dhe as teknologjik, nuk mund ta nxisë zhvillimin shoqëror më shumë sesa investimi te gratë dhe vajzat.
Këtë prag 8 Marsi, bashkë me gratë kryeparlamentare nga të pesë kontinentet, u mblodhëm në Paris në Samitin Botëror, themeluam Rrjetin e Grave Kryeparlamentare dhe miratuam Deklaratën për Barazinë dhe të Drejtat e Grave, në të cilën u bëmë thirrje parlamenteve të të gjitha vendeve të vendosin të drejtat e grave dhe barazinë gjinore në krye të agjendave parlamentare”, shkruan Nikolla.
/gazeta_sot