WhatsApp si aplikacion mjaft popullor i mesazheve, po përgatitet të hap dyert për komunikim me platforma tjera të mesazheve.
Nevoja që WhatsApp të shtonte këtë funksionalitet vjen si përgjigje e drejtpërdrejt ndaj Aktit të Tregjeve Dixhitale të Bashkimit Evropian (DMA), i cili synon të thyejë barrierat midis gjigantëve teknologjik.
Funksioni i ardhshëm do t’i lejojë përdoruesit në BE të lidhen me përdorues të aplikacioneve tjera të mesazheve, edhe nëse ata nuk janë përdorues të WhatsApp, shkruajnë mediat e huaja, përcjell Telegrafi.
Por, ka frikë se komunikimi ndër-platformë mund të rrisë edhe ekspozimin ndaj mashtrimeve. Megjithatë, çdo aplikacion ka politikat e veta të privatësisë, duke i trajtuar potencialisht të dhënat tuaja ndryshe nga WhatsApp.
Lëvizja e fundit nga WhatsApp thuhet se promovon zgjedhje dhe fleksibilitet më të madh në mënyrën se si përdoruesit e aplikacionit lidhen dhe komunikojnë me të tjerët.Nuk dihet ende nëse këto ndryshime do të zbatohen globalisht apo vetëm në BE. /Telegrafi/