Shkolla e Mesme “Skënderbeu” në Maliq do t’i nënshtrohet rehabilitimit të plotë
Një tjetër projekt i rëndësishëm i Bashkisë Maliq është shpallur fitues nga Ministria e Arsimit, në kuadër të programit të bashkëfinancimit me pushtetin vendor. Projekti parashikon rehabilitimin e plotë të Shkollës së Mesme “Skënderbeu”, një investim që synon përmirësimin e ndjeshëm të kushteve për nxënësit dhe stafin pedagogjik.
Punimet do të përfshijnë rikonstruksionin e godinës dhe sistemimin e territorit përreth, duke krijuar një mjedis modern, funksional dhe të përshtatshëm për zhvillimin e procesit mësimor. Gjithashtu, objekti do të shërbejë edhe si një qendër komunitare në funksion të qytetarëve.
Ky investim vjen në vijim të projekteve transformuese në qytetin e Maliqit dhe pas rehabilitimit të Qendrës Kulturore Komunitare “Dhimitër Orgocka”, gjimnazi “Skënderbeu” bëhet objekti i dytë në qendër të qytetit që do të marrë një transformim tërësor.
Bashkia Maliq thekson se arsimi mbetet një nga prioritetet kryesore të zhvillimit vendor, ndërsa investimet në infrastrukturën arsimore synojnë krijimin e kushteve më të mira për brezat e rinj dhe zhvillimin e komunitetit.
Me këtë projekt, Maliqi vijon rrugën e investimeve që e bëjnë qytetin çdo ditë më modern, më funksional dhe më tërheqës për banorët.