12 vite burg për të miturin që vrau bashkëmoshatarin në Pirg të Maliqit
KORÇË – Është dënuar me 12 vite burgim Enedjos Guri, i riu që rreth një vit më parë vrau me thikë bashkëmoshatarin e tij, Erald Xhejo, 14 vjeç, në fshatin Pirg të Maliqit.
Vendimi është dhënë më 9 shtator 2026, nga Gjykata e Korçës, e cila, pas shqyrtimit të provave në dosjen penale, e shpalli fajtor të miturin për veprën penale “Vrasja me dashje” dhe caktoi dënimin prej 12 vitesh burgim.
Dënimi është dhënë në përputhje me dispozitat që lidhen me autorët e mitur. Sipas burimeve të cituara nga gazetari Elton Qyno, nëse autori do të kishte qenë mbi 18 vjeç në momentin e ngjarjes, dënimi i parashikuar do të ishte më i lartë.
Ngjarja e rëndë tronditi banorët e Pirgut dhe të gjithë zonën e Maliqit, pasi viktima ishte vetëm 14 vjeç.
Gjatë procesit gjyqësor, sipas burimeve të cituara, i mituri nuk ka shfaqur pendesë apo kërkuar falje përpara familjes së viktimës.
Vendimi i Gjykatës së Korçës rikthen në vëmendje edhe një herë problematikën e dhunës mes të miturve dhe pasojat tragjike që mund të sjellin konfliktet mes bashkëmoshatarëve.