Nis puna për sistemimin e “Rrugës së Baçave” në Vloçisht, investim i Bashkisë Maliq dhe Këshillit të Qarkut Korçë
Kanë nisur punimet për sistemimin dhe asfaltimin e “Rrugës së Baçave” në fshatin Vloçisht, Njësia Administrative Libonik, një investim i përbashkët i financuar nga Bashkia Maliq dhe Këshilli i Qarkut Korçë.
Në nisjen e punimeve ishte i pranishëm edhe Kryetari i Këshillit të Qarkut Korçë, Petrika Tollkuçi, i cili së bashku me përfaqësues të Bashkisë Maliq ndoqën nga afër fillimin e këtij projekti të rëndësishëm për komunitetin.
Investimi synon përmirësimin e infrastrukturës rrugore, disiplinimin e ujërave të përdorura dhe krijimin e kushteve më të mira për banorët e zonës. Përmes këtij projekti pritet të lehtësohet lëvizja, të rritet siguria dhe të mbështetet zhvillimi i aktivitetit bujqësor, një nga sektorët kryesorë të ekonomisë lokale.
Punimet janë pjesë e investimeve që po realizohen për përmirësimin e infrastrukturës në njësitë administrative të Bashkisë Maliq, me fokus rritjen e cilësisë së jetës dhe zhvillimin e qëndrueshëm të komuniteteve rurale.