Në Korçë u zhvillua një takim i rëndësishëm mes aktorëve dhe faktorëve kryesorë institucionalë e komunitarë, me fokus mbrojtjen e trashëgimisë kulturore dhe frenimin e gërmimeve të paligjshme që po rriten ndjeshëm në zonat arkeologjike të qarkut.
Trashëgimia kulturore, e cilësuar si pasuria më e çmuar e Shqipërisë, vazhdon të përballet me sfida serioze si:
• Trafikimi i paligjshëm i objekteve kulturore
• Mungesë koordinimi ndërinstitucional
• Nevoja për rritjen e kapaciteteve të zbatimit të ligjit
• Ndërgjegjësim i ulët në komunitet
Në tryezë u theksua se gërmimet e paautorizuara, veçanërisht në vendndodhje të rëndësishme si varrezat monumentale të Selcës, jo vetëm po dëmtojnë shtresat arkeologjike, por po e ekspozojnë zonën ndaj trafikimit të mundshëm të objekteve me vlerë të lartë historike.
Ekspertët ngritën shqetësimin se legjislacioni aktual nuk e njeh gërmimin e paligjshëm arkeologjik si vepër penale, një boshllëk që sipas tyre lejon individët të kryejnë dëmtime pa u përballur me pasoja serioze ligjore.
Me mbështetjen e Ambasadës së SHBA-së, projekti i prezantuar synon:
• Të forcojë bashkëpunimin mes institucioneve dhe komunitetit
• Të trajnojë mbi 100 profesionistë të linjës së parë
• Të hartojë strategji sigurie për tre site arkeologjike
• Të realizojë fushata sensibilizuese për të rinjtë dhe komunitetin
Pjesëmarrësit theksuan se vetëm përmes bashkëpunimit të strukturuar, ndërgjegjësimit të publikut dhe forcimit të kuadrit ligjor, trashëgimia kulturore e Korçës mund të mbrohet siç duhet nga dëmtimet dhe abuzimet.