Një tjetër histori suksesi vjen nga Shqipëria, këtë herë nga qyteti i Cërrikut. Nxënësi shqiptar Loris Qose ka arritur një sukses të jashtëzakonshëm në arenën ndërkombëtare, duke u shpallur fitues i vendit të parë në Matematikë, i vlerësuar me Medalje Ari, në Olimpiadën Botërore “Neo Science”, e zhvilluar në Orlando, Shtetet e Bashkuara të Amerikës, në periudhën 9–16 janar 2026.
Në të njëjtën olimpiadë, Loris Qose u vlerësua edhe me Medalje Bronzi në Kimi, duke u renditur në vendin e tretë, çka e bën këtë arritje edhe më domethënëse për përfaqësimin shqiptar.
Ky sukses nuk është vetëm rezultat i talentit, por edhe i punës së palodhur, përkushtimit dhe mbështetjes familjare. Pas këtij triumfi qëndron një histori frymëzuese njerëzore, ku rolin kryesor e ka luajtur nëna e tij, Klodi Qose, një nënë e thjeshtë dhe punëtore, e cila ka qenë mbështetja kryesore e djalit në rrugëtimin drejt suksesit.
Arritja e Loris Qoses është një krenari për qytetin e Cërrikut dhe për gjithë Shqipërinë, duke dëshmuar se me punë, disiplinë dhe mbështetje, të rinjtë shqiptarë mund të arrijnë majat më të larta edhe në skenën ndërkombëtare.