Trishtim dhe heshtje ka pllakosur sot në Maliq, pas tragjedisë që mori dy jetë njerëzish dhe tronditi të gjithë komunitetin.
Nënë e bir, Merjeme Hazisllari, 38 vjeçe, dhe djali i saj Luka Hazisllari, 14 vjeç, humbën jetën pasi u asfiksuan nga zjarri që përfshiu banesën e tyre një ditë më parë.
Në gjendje të rëndë ndodhet vajza e vogël, Nefeli Hazisllari, vetëm 6 vjeçe, e cila po trajtohet në terapi intensive në Pediatrinë e Tiranës, me djegie në fytyrë dhe trup.
Ndërkohë, banesa e familjes Hazisllari është shkrumbuar plotësisht nga flakët, dhe familjarët janë mbledhur në shtëpinë e xhaxhait të fëmijëve, ku janë hapur dyert e mortit.
Ceremonia mortore do të zhvillohet në orën 15:00, ku nënë e bir do të përcillen për në banesën e fundit mes dhimbjes dhe lotëve të të afërmve, fqinjëve dhe banorëve të zonës.
Ngjarja e rëndë ka prekur thellë gjithë qytetin e Maliqit, ndërsa autoritetet po vijojnë hetimet për zbardhjen e plotë të shkaqeve të zjarrit tragjik.