Sot shënohet Dita Ndërkombëtare e Farmacistëve, një ditë që thekson rëndësinë e këtij profesioni fisnik në sistemin e kujdesit shëndetësor. Me këtë rast, Arjan Jaupllari, ish-President i Urdhrit të Farmacistëve për dy mandate, ka ndarë një mesazh mirënjohës dhe vlerësues për koleget dhe kolegët e tij.
Në statusin e tij, Jaupllari thekson se farmacisti nuk është thjesht shpërndarës i barnave, por një hallkë kyçe që shërben si këshilltar i besueshëm për pacientët, edukues për përdorimin e sigurt të medikamenteve, mbrojtës i shëndetit publik dhe partner i pazëvendësueshëm i mjekut.
“Më lejoni të përcjell një falënderim të përzemërt për të gjithë koleget dhe kolegët e mi, të cilët me profesionalizëm dhe përkushtim shërbejnë çdo ditë në komunitet duke dhënë një kontribut të çmuar për shëndetin e qytetarëve”, – shprehet Jaupllari.
Në fund, ai përcjell urime për të gjithë farmacistët në Shqipëri dhe në mbarë botën, duke nënvizuar se roli i tyre sot është më i rëndësishëm se kurrë.
🌿 Urime të gjithë farmacistëve Ditën e tyre ndërkombëtare!