Biznesmeni italian Davide Pecorelli, i cili inskenoi vdekjen e tij në Pukë në vitin 2021 për t’iu shmangur borxheve, do të ekstradohet në Shqipëri. Vendimi u miratua nga ministri italian i Drejtësisë, Carlo Nordio, pas dritës jeshile që kishte dhënë më herët Gjykata e Apelit në Perugia.
Pecorelli është dënuar nga gjykata e Shkodrës me 4 vite burg për mashtrim, zjarrvënie dhe shpifje. Në janar të vitit 2021, makina me të cilën ai udhëtonte u gjet e djegur në Pukë, ku brenda saj u zbuluan mbetje skeletore, duke krijuar dyshimin se ai kishte humbur jetën. Pas një hetimi të gjatë, në shtator të po atij viti, Pecorelli u gjet i gjallë.
Në një deklaratë për median italiane “Il Messaggero Umbria”, biznesmeni ka pranuar vendimin, por është shprehur i shqetësuar për familjen e tij, përfshirë fëmijët e mitur dhe të afërmit me aftësi të kufizuara. Ndërkohë, autoritetet shqiptare po përgatiten për ta pritur dhe për të vijuar procedurat ligjore ndaj tij.