“Para se të kërkojmë dorëheqjen e qeverive, le të japim dorëheqjen nga papërgjegjshmëria.”
Është e lehtë të fajësosh politikën për gjithçka që nuk shkon në Shqipëri.
Dhe shpesh ka arsye për ta bërë. Por një pyetje e thjeshtë mbetet: a do të ndryshonte vërtet Shqipëria nëse nesër do të ndërronin të gjithë politikanët, ndërsa ne do të vazhdonim të silleshim njësoj?
Nëse nuk ndryshojmë mentalitetin, mund të bien 100 qeveri dhe Shqipëria do të vazhdojë të ecë në vend.
Shqipëria nuk është vetëm parlamenti, ministritë apo bashkitë.
Shqipëria është sjellja jonë e përditshme. Është mënyra si respektojmë ligjin, si trajtojmë njëri-tjetrin dhe si sillemi me atë që është e përbashkët.
Sot kemi arritur deri aty sa shumë njerëz rrezikojnë jetën e tjetrit në rrugë pa u menduar dy herë.
Ecin me shpejtësi të çmendur në mes të qytetit, parakalojnë verbërisht, përdorin telefonin gjatë drejtimit të mjetit, ngasin makinën nën efektin e alkoolit apo injorojnë çdo rregull qarkullimi.
Pastaj habitemi pse humbin jetën të rinj, prindër dhe fëmijë në aksidente që mund të ishin shmangur.
Liria nuk do të thotë të bësh çfarë të duash. Liria do të thotë të mos rrezikosh jetën e tjetrit.
Ne ankohemi për korrupsionin, por shpesh jemi gati të japim ryshfet për të zgjidhur punën tonë më shpejt. Ankohemi për padrejtësinë, por kërkojmë mik kur na leverdis.
Kërkojmë rend, por nuk respektojmë radhën. Kërkojmë pastërti, por hedhim mbeturina në rrugë. Kërkojmë shtet ligjor, por duam përjashtim për veten.
Nuk mund të ndërtojmë një shoqëri të civilizuar duke menduar se rregullat vlejnë vetëm për të tjerët.
Një shoqëri bëhet më e mirë kur qytetarët e saj bëhen më të mirë.
Kur votojnë me ndërgjegje dhe nuk e shesin votën. Kur kryejnë me ndershmëri punën e tyre. Kur paguajnë detyrimet që u takojnë. Kur nuk zaptojnë pronën publike. Kur respektojnë mjedisin. Kur denoncojnë abuzimin dhe nuk bëhen pjesë e tij.
Të jesh qytetar nuk do të thotë vetëm të kërkosh të drejta.
Do të thotë të mbash edhe përgjegjësi.
Shqipëria që duam nuk do të vijë nga një shpëtimtar, nga një parti apo nga një qeveri e re. Ajo do të vijë kur të kuptojmë se secili prej nesh është një pjesë e problemit, por edhe një pjesë e zgjidhjes.
Prandaj, para se të kërkojmë dorëheqjen e qeverive, le të japim dorëheqjen nga korrupsioni i vogël, nga papërgjegjshmëria, nga egoizmi, nga mosrespektimi i ligjit dhe nga zakoni për të fajësuar gjithmonë të tjerët.
Vetëm atëherë do të fillojmë të bëhemi jo thjesht më të pasur apo më modernë, por më të qytetëruar.
Dhe një komb i qytetëruar është shumë më i fortë se çdo qeveri…