Drejtoria Vendore e Policisë Korçë ka referuar materialet në Prokurori dhe ka nisur procedime penale për disa shtetas, për vepra të ndryshme penale.
Specialistët për Hetimin e Narkotikëve proceduan penalisht shtetasin J. Ç., 33 vjeç, banues në Korçë, pasi gjatë një kontrolli fizik në lagjen nr. 18 iu gjet dhe iu sekuestrua një sasi e vogël lënde e dyshuar narkotike Cannabis Sativa.
Gjithashtu, Specialistët për Hetimin e Krimeve të Komisariatit të Policisë Korçë nisën procedim penal për:
- M. M., 42 vjeç, banues në fshatin Zvirinë, Maliq, i dyshuar për ushtrim dhune fizike dhe psikologjike ndaj bashkëjetueses, e cila është pajisur me urdhër mbrojtjeje;
- J. L., 20 vjeç dhe H. L., 42 vjeç, banues në Korçë, të dyshuar se janë konfliktuar fizikisht me shtetasin R. M., 65 vjeç, i cili pas mjekimit në spital është larguar për në banesë;
- K. S., 19 vjeç, banues në Korçë, i dyshuar për kanosje me fjalë përmes telefonit ndaj shtetasit B. C.;
- J. Ll., 63 vjeç, banues në Korçë, i dyshuar se ka goditur fizikisht shtetasin J. T., për motive të dobëta.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.