Drejtoria Vendore e Policisë Korçë
Specialistët e Sektorit për Hetimin e Narkotikëve referuan materialet në Prokurori, ku filloi procedimi penal për shtetasin M. B., 27 vjeç, banues në fshatin Kuç, pasi gjatë kontrollit fizik iu gjet një sasi lënde e dyshuar narkotike kanabis.
Gjithashtu, specialistët e Sektorit të Qarkullimit Rrugor referuan materialet në Prokurori për shtetasin Gj. L., 52 vjeç, banues në Bilisht, pasi dyshohet se ka aksidentuar lehtë një këmbësore dhe është larguar nga vendi i ngjarjes.
Shërbimet e Komisariatit të Policisë Korçë referuan materialet në Prokurori për shtetasen V. K., 24 vjeçe, banuese në Maliq, pasi dyshohet se ka kanosur me fjalë xhaxhanë e saj dhe ka thyer disa shishe vere në biznesin e tij.
Ndërkohë, në Pogradec u proceduan penalisht:
- O. S., 32 vjeç, banues në Pogradec, i kapur duke transportuar me kamion 25 m³ lëndë drusore të prerë në mënyrë të paligjshme;
- Dy 17-vjeçarë, të cilët dyshohet se janë konfliktuar me një 16-vjeçar për motive të dobëta.
Në Maliq, Policia referoi materialet për:
- K. Sh., 24 vjeç, banues në fshatin Pojan, pasi dyshohet se ka ushtruar dhunë ndaj vëllait të tij;
- M. P., 32 vjeç, banues në Maliq, pasi dyshohet se për motive të dobëta ka goditur me grushte një 30-vjeçar;
- Një 15-vjeçar, i cili ka gjuajtur me shuplakë një 6-vjeçar.
Në Devoll, u proceduan shtetasit G. G., 70 vjeç dhe Z. Ç., 54 vjeç, banues në Bilisht, të cilët u kapën duke qëlluar me armë gjahu që i dispononin me leje, në kundërshtim me monatoriumin e gjuetisë. Armët dhe municioni u sekuestruan në cilësinë e provës materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.