Qafë Thanë – Shërbimet e Policisë Kufitare kanë arrestuar përkohësisht një 29-vjeçar nga Maqedonia e Veriut, i shpallur në kërkim ndërkombëtar nga autoritetet austriake për veprën penale “Trafikimi i narkotikëve”.
Gjatë kontrolleve të imtësishme në hyrje/dalje të territorit shqiptar, me qëllim parandalimin e paligjshmërive në kufi dhe kapjen e personave në kërkim, policia ndaloi në dalje shtetasin M. G., 29 vjeç, banues në Veleshtë, Maqedonia e Veriut.
Nga verifikimet e kryera dhe informacioni i shkëmbyer përmes Interpol Tiranës me partnerët austriakë, rezultoi se i riu ishte shpallur në kërkim ndërkombëtar nga Interpol Viena si i dyshuar për trafik narkotikësh.
Në bashkëpunim me autoritetet austriake, vijojnë procedurat për ekstradimin e tij drejt Austrisë.