Në një postim në rrjetet sociale, drejtori i sektorit të bujqësisë në Bashkinë Maliq, z. Arben Dulellari, ka vënë theksin te rëndësia e kulturës së misrit në ekonominë bujqësore të zonës.
Sipas tij, misri është një ndër kulturat kryesore që mbillen në fushat e Maliqit, me një destinacion të qartë: përdorimi si koncentrat për blegtorinë dhe për komplekset e pularive, të cilat janë të përhapura në territorin e bashkisë.
Z. Dulellari thekson se, pavarësisht kushteve të vështira të kësaj vere — me temperatura të larta, thatësirë të tejzgjatur dhe rezerva të pakta ujore — tokat torfike kanë treguar përshtatshmëri më të lartë për kultivimin e misrit, duke ruajtur freskinë dhe gjelbërimin e bimës.
Ai apelon që prioriteti për kultivimin e misrit të zhvendoset drejt tokave torfike, që në Maliq zënë rreth 5,000 hektarë. Po ashtu, thekson se hibride cilësorë me cikël të shkurtër apo të mesëm janë tashmë të disponueshëm dhe ofrojnë rendimente të kënaqshme, duke justifikuar investimin dhe përpjekjet e fermerëve.
Ky vlerësim vjen në një kohë kur sfidat klimatike kërkojnë strategji të reja për të garantuar prodhim të qëndrueshëm dhe cilësor në sektorin bujqësor.