Reagim pas rastit të dhunës mes të miturave,Rudina Bregu: “STOP dhunës dhe bullizmit”..
Pas pamjeve shqetësuese të një vajze të dhunuar nga bashkëmoshataret e saj, Administratorja e Njësisë Administrative Libonik, Rudina Bregu, ka reaguar publikisht, duke e cilësuar ngjarjen si një alarm serioz për shoqërinë.
Në reagimin e saj, Bregu thekson se ngjarje të tilla nuk mund të konsiderohen thjesht si “sherr mes adoleshentësh”, por përfaqësojnë dhunë, poshtërim dhe mungesë të theksuar edukate, respekti e përgjegjësie.
Ajo shpreh shqetësimin edhe për fenomenin e normalizimit të sjelljeve të papranueshme, duke theksuar se heshtja përballë bullizmit, kërcënimeve dhe shkeljes së rregullave vetëm sa e përkeqëson situatën.
“Sot ishte ajo vajzë. Nesër mund të jetë fëmija i kujtdo prej nesh,” shprehet Bregu, ndërsa u bën thirrje institucioneve dhe shoqërisë të vendosin kufij të qartë, të zbatojnë ligjin dhe të kërkojnë përgjegjësi nga kushdo që ushtron dhunë.
Në fund të mesazhit të saj, Administratorja e Libonikut apelon për më shumë edukatë, respekt dhe përgjegjësi, duke theksuar se asnjë fëmijë apo i rritur nuk duhet të jetë viktimë e dhunës.