Drejtoria Vendore e Kufirit dhe Migracionit Korçë ka referuar materialet në Prokurori, ku ka nisur procedimi penal për dy shtetas, për vepra të ndryshme penale.
Specialistët për Hetimin e Krimeve të DVKM Korçë proceduan penalisht shtetasin P. K., 60 vjeç, banues në Korçë, për veprën penale “Kontrabanda me mallra të tjera”. Gjatë një kontrolli të ushtruar në aksin rrugor “Kapshticë–Bilisht”, në automjetin që drejtonte ky shtetas u gjetën dhe u sekuestruan mallra të ndryshme dhe pjesë për automjete, të dyshuara si të kontrabanduara, për të cilat nuk dispononte faturë tatimore.
Gjithashtu, u procedua penalisht shtetasi Q. D., 31 vjeç, banues në fshatin Feras, Divjakë, për veprën penale “Kalimi i paligjshëm i kufirit shtetëror”, pasi dyshohet se ka kaluar ilegalisht kufirin drejt Greqisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.